Björn Ólafsson konsertmeistari í góðra vina hópi, Rudolf Serkin t.v. og Adolf Busch t.h. Myndin sennilega tekin er þeir tengdafeðgar heimsóttu Ísland 1946 Næsta sunnudag, 29. maí, verða leiknar upptökur með leik Björns Ólafssonar konsertmeistara í Listasafni Sigurjóns Ólafssonar og hefjast tónleikarnir klukkan 17:00. Listasafn Sigurjóns, í samvinnu við Safn-RÚV, flytur brot úr hljóðmenningarsögu Íslendinga í góðum hljómflutningstækjum í hljómmiklum sal safnsins. Þann 15. maí voru endurteknir tónleikar Adolf Busch frá 1945 og viku síðar voru fluttar upptökur með leik Björns Ólafssonar á tveimur einleiksverkum fyrir fiðlu eftir J.S. Bach, E-dúr Partítuna og C-dúr Sónötuna. Í byrjun tónleikanna flutti Hreinn Valdimarsson erindi um sögu hljóðritunar á Íslandi. Sunnudaginn 29. maí klukkan 17:00 verða fluttar upptökur þar sem Björn flytur a-moll sónötuna, g-moll sónötuna og d-moll partítuna eftir J.S. Bach og kynnir hann verkin fyrir flutninginn. Hvatinn af þessum uppákomum er meðvitundin um nauðsyn þess að miðla sögunni, eða eins og Gylfi Þ. Gíslason sagði í ræðu við opnun Norræna Hússins í Reykjavík 1968. „Þjóð sem gleymir sögu sinni glatar sjálfri sér. Sá maður sem man ekki uppruna sinn er aðeins hálfur maður.“ Björn Ólafsson konsertmeistari fæddist 26. febrúar 1917. Hann var meðal fyrstu nemenda Tónlistarskólans í Reykjavík og einn þeirra fjögurra sem fyrstir voru brautskráðir úr skólanum vorið 1934. Hann stundaði framhaldsnám í Vínarborg og lauk prófi þar vorið 1939 með þeim árangri að hann var strax ráðinn sem fyrsti fiðluleikari að Vínarfílharmoníunni sem þá var undir stjórn Wilhelm Furtwänglers. Hann kom heim til Íslands sumarið 1939 og ætlaði að standa stutt við, en síðari heimsstyrjöldin hófst þá um haustið og kom í veg fyrir að hann kæmist aftur til Vínar. Björn réðst sem aðalfiðlukennari við Tónlistarskólann í Reykjavík, varð yfirkennari strengjadeildar skólans og stofnaði hljómsveit Tónlistarskólans. Þegar Sinfóníuhljómsveit Íslands var stofnuð árið 1950 varð hann fyrsti konsertmeistari hljómsveitarinnar og hélt þeirri stöðu til 1972. Árið 1942 kvæntist hann Kolbrúnu Jónasdóttur og dvöldu þau mörg sumur hjá skyldfólki Kolbrúnar á Halldórsstöðum í Laxárdal og undi Björn sér hvergi betur en þar. Björn Ólafsson var í framvarðarsveit þeirra einstaklinga sem með þrotlausri vinnu sinni og hugsjónum náðu að auðga menningarlíf vort svo að við urðum á örskömmum tíma samkeppnishæf við aðrar Evrópuþjóðir. Hann lést í Reykjavík 1984. | |
Ábyrgðarmaður fréttatilkynningar er Hlíf
Sigurjónsdóttir sími 863 6805
|
