|
Í haust og vetur tekur Listasafn Sigurjóns Ólafssonar upp þá
nýbreytni að standa fyrir menningarviðburðum − tónleikum,
flutningi hljóðrita og kynningum á sögulegu efni − í sal
safnsins á Laugarnesi. Hafa verið fest kaup á vönduðum
hljómflutningstækjum og myndvarpa í þeim tilgangi. Stefnt er að tveimur lotum í vetur, annars vegar í október og nóvember, og hins vegar á vormánuðum 2023. Viðburðirnir verða í anda sumartónleikanna, á þriðjudagskvöldum, um klukkustundar langir og boðið er upp á kaffi í kaffistofu safnsins á eftir þar sem rabba má við flytjendur. Þessir viðburðir munu þó hefjast klukkan 20:00, í stað 20:30 eins og sumartónleikarnir gera. |
||
| Þriðjudaginn 18. október kl. 20:00 |
 |
Bach tónleikar Adolf Busch Flutt verður hljóðritun frá tónleikum sem haldnir voru í Trípólí bíói fyrstu dagana í september 1945, þar sem Adolf Busch lék einleik með Strengjasveit Tónlistarfjelagsins. Leikin voru verk eftir J.S. Bach: Fiðlukonsertar í a moll og E dúr og Sónata fyrir einleiksfiðlu í C dúr auk kafla úr Partítu í d moll. Tónleikarnir voru hljóðritaðir á lakkplötur sem farnar eru að skemmast og hefur Hreinn Valdimarsson hreinsað þær og flutt efnið á varanlegt geymsluform. Dagskrá þessi var áður flutt í Listasafni Sigurjóns í maí í vor, en fáir sáu sér fært að mæta og hafa borist óskir um að hann verði endurtekinn. |
| Þriðjudaginn 25. október kl. 20:00 |
 |
Markan systkinin Dagskrá um Maríu Markan sópransöngkonu, skipt niður á tvö kvöld. Á fyrra kvöldinu verður, auk Maríu, fjallað um þrjú systkini hennar, sem öll voru mjög þekktir söngvarar á sinni tíð. Elísabet var elst þeirra, hún samdi lög, tók þátt í fjölmörgum merkum tónlistarviðburðum og söng oft í útvarp. Einar stundaði söngnám í Noregi og Þýskalandi og söng inn á fjölmargar hljómplötur. Hann samdi hátt í 50 lög og hefur eitt þeirra, Fyrir átta árum, notið mikilla vinsælda. Sigurður söng einnig á hljómplötur og í útvarp. Einar gaf út ljóðabækur og hélt myndlistarsýningar. Dagskrárgerð er í höndum Trausta Jónssonar og Hreins Valdimarssonar. |
| Sunnudaginn 30. október kl. 15:00 |
 |
Glymskrattinn − fjölskyldutónleikar Óperudagar 2022 Glymskrattinn eru ófyrirsjáanlegir fjölskyldutónleikar þar sem tónleikagestum er sjálfum leyft að velja tónleikaprógrammið af tónlistarseðli dagsins. Á tónlistarseðlinum gætir ýmissa grasa frá ólíkum tímabilum tónlistarsögunnar og því geta gestir átt von á fjölbreyttu tónlistargúmelaði. Stemningin er afslöppuð og innileg og stundum fá áheyrendur meira að segja að taka örlítinn þátt í flutningnum. Flytjendurnir koma frá Hollandi, Brasilíu og Íslandi og leikið er á selló, harmonikku, brasilískan gítar og fiðlu. |
| Þriðjudaginn 1. nóvember kl. 20:00 |
 |
Maríu Markan Síðari hluti dagskrár um Maríu Markan sópransöngkonu. Hún fæddist í Ólafsvík 1905, nam söng í Þýskalandi og starfaði þar fram að heimsstyrjöld og var þar þekkt og virt. Eftir það hélt hún til Vesturheims og starfaði meðal annars við Metropolitan óperuna í New York borg, fyrst Íslendinga. Eftir hana liggja fjölmargar upptökur, bæði útgefnar á plötum og í fórum Ríkisútvarpsins. Fjallað verður um atvinnuferil söngkonunnar hérlendis og erlendis og leiknar upptökur með söng hennar. Dagskrárgerð er í höndum Trausta Jónssonar og Hreins Valdimarssonar.. |
| Þriðjudaginn 8. nóvember kl. 20:00 |
 |
Kvöldstund í umsjón Oddfellow
hreyfingarinnar í Reykjavík Árið 1898 reistu danskir Oddfellowar holdsveikraspítala í Laugarnesi. Spítalinn, sem var gríðarstórt timburhús og líklega stærsta hús landsins á þeirri tíð, var framlag danskra Oddfellowa í baráttu við hinn hræðilega sjúkdóm sem lengi hafði verið landlægur hér. Íslenskir Oddfellowar hafa haldið við minningu þessarar gjörðar, meðal annars með því að grafa upp hluta af grunni spítalans á Laugarnesi og merkja með kynningarspjaldi. Á þessari kvöldstund munu þeir kynna starf sitt og sögu spítalans. |
| Þriðjudaginn 15. nóvember kl. 20:00 |
 |
Tónleikar Nína Margrét Grímsdóttir flytur einleiksverk fyrir píanó, meðal annars eftir nokkur af okkar fyrstu menntuðu tónskáldum, svo sem Pál Ísólfsson, Sveinbjörn Sveinbjörnsson og Jón Leifs. 
|
| Laugardaginn 19. nóvember kl. 14−17 |
 |
Málþing um opinber listaverk í Danmörku og á Íslandi
á tímabilinu 1925−1940 Fjallað er um listaverk í opinberu rými, ábyrgð og viðhald. Meðal flytjenda eru Tom Hermansen, Jens Peter Munk, Hlynur Helgason, Birgitta Spur og Indriði Níelsson. |
| Þriðjudaginn 22. nóvember kl. 20:00 |
 |
Tónleikar Duo Landon, sem skipað er Hlíf Sigurjónsdóttur fiðluleikara og Martin Frewer víóluleikara flytja Dúett fyrir fiðlu og víólu í G dúr eftir W.A. Mozart, Þrjá madrigala fyrir fiðlu og víólu eftir Bohuslav Martinů og Passacaglia eftir G.F. Händel / Johan Halvorsen. |