|
Fréttatilkynning frá Listasafni Sigurjóns Ólafssonar
Smellið
hér til að skoð í vafra
„Hrosshár á strengi“ Fyrstu tónleikar vorannar í Listasafni Sigurjóns Ólafssonar Á liðnu hausti tók Listasafn Sigurjóns Ólafssonar upp þá nýbreytni að standa fyrir reglulegum menningarviðburðum - tónleikum, flutningi hljóðrita og kynningum á sögulegu efni - í sal safnsins á Laugarnesi. Fest voru kaup á vönduðum hljómflutningstækjum og myndvarpa í þeim tilgangi. Viðburðirnir eru í anda sumartónleikanna, á þriðjudagskvöldum, um klukkustundar langir, en hefjast klukkan 20:00, og boðið er upp á kaffi í kaffistofu safnsins á eftir þar sem rabba má við flytjendur. Á liðnu hausti voru átta slíkir viðburðir á tímabilinu frá 18. október til 22. nóvember og vordagskráin er næstum tilbúin og hefur verið birt á netsíðu safnsins. Samstarf hefur verið tekið upp við FÍT (Félag íslenskra tónlistarmanna) um að félagið sjái um eina tónleika í mánuði. Vorönnin hefst þann 14. febrúar með tónleikum Hlífar Sigurjónsdóttur fiðluleikara og Povl Balslev orgel- og píanóleikara sem nefnast „Hrosshár á strengi og holað innan tré“ − brot úr sögu klassísks fiðluleiks á Íslandi. Meðal annars verður fjallað um Þórarin Guðmundsson (1896−1979) sem fyrstur Íslendinga hélt utan til að læra klassískan fiðluleik og að hafa fiðluleik og kennslu að aðalstarfi. Leikin verða lög frá hans tíð og eftir hann, sum hver á fiðlu sem hann lék á. Samstarf Hlífar og Povls hófst fyrir sjö árum og hafa þau haldið tónleika á Íslandi og í Danmörku, bæði sem fiðlu og píanó dúó og einnig með samleik fiðlu og orgels, nú síðast í Eyrarbakkakirkju og Grafarvogskirkju 11. og 12. febrúar. | ||
  |
Hlíf Sigurjónsdóttir
er fædd í Kaupmannahöfn en ólst upp í Reykjavík.
Hún nam fiðluleik hjá
Birni Ólafssyni
konsertmeistara við
Tónlistarskólann í Reykjavík og fór síðar
til framhaldsnáms við Háskólana í Indiana og Toronto og
Listaskólann í Banff í Klettafjöllum Kanada. Einnig nam hún hjá
Gerald Beal fiðluleikara í
New York borg. Á námsárum sínum kynntist hún og vann með
mörgum merkustu tónlistarmönnum tuttugustu aldarinnar, þar
á meðal William Primrose, Zoltan Szekely, György Sebök, Rucciero
Ricci og Igor Oistrach. Hlíf hefur haldið fjölda einleikstónleika og leikið
með sinfóníuhljómsveitum og kammersveitum víða um
Evrópu, í Bandaríkjunum og Kanada. Haustið 2014 kom geisladiskurinn DIALOGUS út hjá MSR Classics í Bandaríkjunum með einleiksverkum í hennar flutningi, sem samin hafa verið sérstaklega fyrir hana. Maria Nockin, gagnrýnandi Fanfare Magazine, tilnefndi þann disk „CD of the year 2015“. Síðar endurútgaf sama útgáfufyrirtæki tvöfaldan geisladisk, frá árinu 2008, þar sem hún lék allar sónötur og partítur fyrir einleiksfiðlu eftir Johann Sebastian Bach. Hafa báðir þessir diskar hlotið mikið lof gagnrýnenda. Hlíf er listrænn stjórnandi Sumartónleika Listasafns Sigurjóns Ólafssonar og hefur tekið þátt í starfi safnsins frá upphafi. | |
 |
Povl Christian Balslev er fæddur í
Fjelsted á Fjóni og er kominn af prestum í marga ættliði.
Hann nam
orgelleik við Sweelinck tónlistarháskólann
í Amsterdam 1989-90 og lauk Kirkjutónlistarprófi frá
konunglega danska Tónlistarháskólanum 1996 með
orgelleik og stjórnun sem höfuðfög. Síðan hefur hann numið hjá
fjölda kennara, m.a. Harald Vogel, David Sanger, Anders Bondeman, H.O. Ericsson, Jon Laukvik og
Lars Ulrik Mortensen (á cembalo) og í spuna hjá William Porter í Boston.
Povl er tónskáld, píanó- og orgelleikari. Árið 2003 lauk hann námi í leik á klukknaspil og hefur síðan leikið á kirkjuklukkur víða í Evrópu, Bandaríkjunum og Japan. Árið 2002 tók hann við stöðu organista, kantors og klukknaspilsleikara við Vorfrúarkirkjuna í Svendborg á Fjóni og einnig kennir hann við kirkjutónlistarskólann í Løgumklaustri. Povl hefur mikinn áhuga á kórsöng og kórastarfi og stjórnar tveimur kórum í Svendborg. Hann hefur staðið fyrir tónlistarhátíðum þar, t.d. Vorfrúarhátíðinni, kórahátíðinni SyngSydfyn og fjölþjóðlegu klukknaspilshátíðinni sem haldin er þar sérhvert sumar. Þá er hann ötull flytjandi eigin tónlistar og annarra, leikur á píanó jafnt sem orgel og hefur gefið út fjölda geisladiska. Hann hefur samið tónverk fyrir kóra, orgel, kammersveitir og einnig fyrir leikhús og kvikmyndir. Hann heldur fyrirlestra og hefur ritað greinar og bókarkafla um tónlist og árið 2009 kom út eftir hann ævisaga danska tónskáldsins Th. Aagaard þar sem hann rekur einnig sögu söngtónlistar á Fjóni. Povl Christian samdi svítu í 5 þáttum fyrir fiðlu og píanó fyrir Hlíf Sigurjónsdóttur, við höggmynd föður hennar Fótboltamenn. | |
| ||