Fréttatilkynning frá Listasafni Sigurjóns
Ólafssonar 02.04.24 Hlíf Sigurjónsdóttir og Martin Frewer leika Brot úr þriggja alda sögu fiðludúósins í Listasafni Sigurjóns Ólafssonar þriðjudagskvöldið 9. apríl klukkan 20:00 
Dúó Landon varð til þegar hinn þekkti
fiðlu- og bogasmiður Christophe Landon bað þau Hlíf
Sigurjónsdóttur og Hjörleif Valsson, sem
bæði leika á fiðlur sem hann hefur smíðað,
að hljóðrita 44 Dúó eftir Béla Bartók
inn á geisladisk til kynningar á hljóðfærum
sínum. Tónlistargagnrýnandi
Morgunblaðsins gaf þeim disk fimm stjörnur með
orðunum „Þjóðleg innlifun á
heimsmælikvarða“. Geisladiskurinn var
endurútgefinn hjá MSR-Classics í
Bandaríkjunum árið 2012.
Í framhaldi af góðum viðtökum þess disks var hafin leit að tónverkum fyrir tvær fiðlur eftir íslensk tónskáld, en þessi hljóðfæraskipan er vinsæl á meginlandi Evrópu og hafa mörg tónskáld samið öndvegis verk fyrir hana. Aðeins fundust tónverk þriggja tónskálda fyrir þessa skipan, þeirra Þorkels Sigurbjörnssonar, Elíasar Davíðssonar og Finns Torfa Stefánssonar. Duo Landon, nú skipað Hlíf og Martin Frewer, bað því þrjú íslensk tónskáld, þau Hildigunni Rúnarsdóttur, Atla Heimi Sveinsson og Jónas Tómasson að semja hvert sitt tónverk og urðu þau góðfúslega við því. Öll þessi tónverk voru hljóðrituð og gefin út á geisladiskinum „Icelandic Violin Duos“. Hlaut sá diskur einnig fimm stjörnur hjá gagnrýnanda Morgunblaðins og CD Hotlist í Bandaríkjunum valdi diskinn á CD HotList í júlí 2013. Síðan þá hefur dúóið haldið fjölda tónleika og leikur Martin jöfnum höndum á fiðlu og víólu. Efnisskrá þessara tónleika teigir sig allt aftur til fyrri hluta 18. aldar, en elsta verkið er í síðbarrokk stíl, Sónata í D dúr eftir Jean Marie Leclair og eftir annað miðevrópskt verk, Concertant Duo eftir Charles Auguste de Beriot verða leikin íslensk verk eftir Þorkel Sigurbjörnsson, Hildigunni Rúnarsdóttur og Martin Frewer. Einnig verða leikin nokkur af þeim þingeysku fiðlulögum sem Páll H. Jónsson skráði og Martin hefur útsett fyrir tvær fiðlur. Hlíf Sigurjónsdóttir er fædd í Kaupmannahöfn en ólst upp í Reykjavík. Hún nam fiðluleik hjá Birni Ólafssyni konsertmeistara við Tónlistarskólann í Reykjavík og fór síðar til framhaldsnáms við Háskólana í Indiana og Toronto og Listaskólann í Banff í Klettafjöllum Kanada. Einnig nam hún hjá Gerald Beal fiðluleikara í New York borg. Á námsárum sínum kynntist hún og vann með mörgum merkustu tónlistarmönnum tuttugustu aldarinnar, þar á meðal William Primrose, Zoltan Szekely, György Sebök, Rucciero Ricci og Igor Oistrach. Hlíf hefur haldið fjölda einleikstónleika og leikið með sinfóníuhljómsveitum og kammersveitum víða um Evrópu, í Bandaríkjunum og Kanada. Haustið 2014 kom geisladiskurinn DIALOGUS út hjá MSR Classics í Bandaríkjunum með einleiksverkum í hennar flutningi, sem samin hafa verið sérstaklega fyrir hana. Maria Nockin, gagnrýnandi Fanfare Magazine, tilnefndi þann disk „CD of the year 2015“. Síðar endurútgaf sama útgáfufyrirtæki tvöfaldan geisladisk, frá árinu 2008, þar sem hún lék allar sónötur og partítur fyrir einleiksfiðlu eftir Johann Sebastian Bach. Hafa báðir þessir diskar hlotið mikið lof gagnrýnenda. Hlíf er annt um íslenska menningu og sögu klassískrar tónlistar á Íslandi og sá til dæmis um útgáfu geisladisks 2020 með fiðluleik Björns Ólafssonar úr fórum RÚV og hefur staðið fyrir tónleikum þar sem leiknar voru gamlar sögulegar upptökur, sem að hennar undirlagi voru yfirfærðar og hljóðhreinsaðar af þessu tilefni. Hlíf hefur verið umsjónarmaður Sumartónleika Listasafns Sigurjóns frá upphafi. Martin Frewer fæddist í bænum Dartford í úthverfi Lundúna og hóf að læra á píanó sex ára gamall í Dorset og nokkru síðar einnig á fiðlu. Hann stundaði nám í Oxford University, þaðan sem hann útskrifaðist með gráðu í stærðfræði, en samtímis sótti hann fiðlutíma hjá Yfrah Neaman. Eftir útskrift frá Oxford hélt hann áfram fiðlunámi í Guildhall School of Music & Drama í London hjá Yfrah Neaman og lærði þá einnig á víólu hjá Nannie Jaimeson. Martin hefur sótt tíma og tekið þátt í opnum kennslustundum hjá Igor Ozim, Martin Loveday, Eric Gruenberg, Almita og Roland Vamos, Peter Guth, Ake Lundeberg og Lin Yaoti. Árið 1983 var Martin ráðinn til starfa hjá Sinfóníuhljómsveit Íslands og hefur búið hér síðan og unnið jöfnum höndum að hönnun tölvuhugbúnaðar og fiðluleik. Hann starfar nú sem hugbúnaðarverkfræðingur hjá Marel og leikur með sem lausamaður hjá Sinfóníuhljómsveit Íslands. Hann er mjög laginn útsetjari og er stofnandi og leiðtogi kammersveitarinnar Spiccato. | |
|