Þriðjudaginn 4. september kl. 20:30
Trío Nordica.
Auður Hafsteinsdóttir fiðluleikari, Bryndís Halla Gylfadóttir sellóleikari og Mona Sandström píanóleikari flytja Dumky tríóið eftir Dvorak, tvö tríó eftir Piazzolla og píanótríó eftir Elfrida Andrée. Er þetta frumflutningur verksins hér á landi.

Auður Hafsteinsdóttir stundaði framhaldsnám við New England Conservatory í Boston og University of Minnesota þaðan sem hún lauk Master of Music gráðu árið 1991. Hún hefur hlotið fjölda viðurkenninga fyrir leik sinn, t.d. C.D. Jackson verðlaunin á Tanglewood tónlistarhátíðinni 1985 og fyrstu verðlaun í The Schubert Club Soloist Competition í Minneapolis 1988. Árið 1991 var hún valin borgarlistamaður Reykjavíkur til þriggja ára og þremur árum síðar hlaut hún listamannalaun, einnig til þriggja ára. Hún var valin bæjarlistamaður Seltjarnarness árið 2005. Auður hefur komið víða fram sem einleikari og í kammermúsik á alþjóðlegum vettvangi og tekið þátt í tónlistarhátíðum, m.a. í Bandaríkjunum, Kanada, á meginlandi Evrópu, Japan og Kína. Auður hefur leikið inn á fjölda geisladiska fyrir innlend og erlend útgáfufyrirtæki. Hún kennir fiðluleik við Tónlistarskólann í Reykjavík og Listaháskóla Íslands.

Bryndís Halla Gylfadóttir lauk einleikaraprófi frá Tónlistarskólanum í Reykjavík árið 1984 undir handleiðslu Gunnars Kvaran. Eftir það hélt hún til náms við New England Conservatory í Boston þar sem kennarar hennar voru Lawrence Lesser og Colin Carr. Hún lauk þar Meistaranámi árið 1989. Ári síðar tók Bryndís Halla við leiðandi stöðu sellóleikara Sinfóníuhljómsveitar Íslands og gegnir því starfi nú. Hún hefur verið virkur þátttakandi í íslensku tónlistarlífi undanfarin ár, jafnt sem einleikari og í kammertónlist. Hún hefur leikið inn á fjölda geisladiska. Auk þess að leika á tónleikum hér á landi spilar Bryndís Halla reglulega á tónleikum bæði í Evrópu og Asíu.

Mona Sandström er fædd í Svíþjóð og kom fyrst fram sem einleikari með Norrköping sinfóníuhljómsveitinni aðeins 12 ára gömul. Árið 1987 lauk hún einleikaraprófi með hæstu einkunn frá Sibelusarakademiunni í Helsinki. Hún hefur leikið einleik með mörgum af helstu hljómsveitum í Svíþjóð, haldið einleikstónleika og tekið þátt í kammermúsík víða um Evrópu. Hún hefur oft leikið fyrir útvarp og sjónvarp og hljóðupptökur. Mona starfar sem píanóleikari með kammerhljómsveitinni í Sundsvall.

Trio Nordica var stofnað árið 1993 og hefur leikið víðs vegar í Evrópu og Bandaríkjunum þar á meðal í Skandinavíu, Englandi, Frakklandi, Ítalíu og á Íslandi. Auk þess að leika helstu verk fyrir píanótríó leitast Trio Nordica við að flytja verk eftir kventónskáld og tónskáld samtímans.