Hlíf Sigurjónsdóttir fiðluleikari stundaði framhaldsnám við Háskólana í Indiana og Toronto og Listaskólann í Banff og sótti síðar tíma til Gerald Beal fiðluleikara í New York borg. Á námsárum sínum kynntist hún og vann með mörgum merkustu tónlistarmönnum tuttugustu aldarinnar, þar á meðal William Primrose, Zoltan Szekely, György Sebök, Rucciero Ricci og Igor Oistrach. Hún hefur haldið fjölda einleikstónleika og leikið með sinfóníuhljómsveitum, kammersveitum og minni hópum í Evrópu, Bandaríkjunum og Kanada. Frá nýliðnum árum má nefna tónleika í Weill sal Carnegie Hall í New York og í Washington borg, í röðinni The Embassy Series. Geisladiskur hennar og Hjörleifs Valssonar; 44 Duos eftir Béla Bartók hefur hlotið frábæra umsögn tónlistargagnrýnenda. Hlíf kennir einkanemum í New York borg og í Reykjavík.

Sellóleikarinn Julia MacLane er frá Prince Edward Island í Kanada. Hún lærði hjá Timothy Eddy við Juilliard tónlistarháskólann og Mannes College of Music, og hjá Antonio Lysy við McGill háskólann. Julia hefur komið fram sem einleikari og með kammerhópum í Kanada, Bandaríkjunum, Argentínu og í Evrópu. Í fyrra lék hún konsert fyrir fiðlu og selló eftir J. Brahms í Montreal í Kanada og lauk einnig við að hljóðrita öll sellóverk ástralska tónskáldsins Katia Tiutiunnik. Í september 2007 tekur Julia við styrk sem Akademía Carnegie Hall, Juilliard skólans og Weill stofnunarinnar veita sameiginlega og felur í sér að flytja kammermúsík í tónleikasölum þessara stofnana og kenna í grunnskólum New York borgar.
  Julia leikur jöfnum höndum nútímaverk og eldri tónlist og telur mikilvægt að leika ný tónverk með klassískum verkum og - á sama hátt - að mikilvægi klassískra verka gleymist ekki fyrir nútímaverkum.

Hlíf og Julia leika á hljóðfæri sem hinn þekkti hljóðfærasmiður Christophe Landon hefur smíðað með bogum sem Isaac Salchow smíðaði.

"Gríma" er samið við samnefnd verk Sigurjóns Ólafssonar
Gríma, bronsmynd frá 1947	Gríma steinmynd frá 1947	Gríma, stækkuð, reist við Borgarleikhúsið 1995