"Stríð og friður" í Listasafni Sigurjóns. Sónötur fyrir fiðlu og píanó eftir Grieg og Prokofiev.

Á sumartónleikum Listasafns Sigurjóns Ólafsson þriðjudagskvöldið 23. ágúst leika Auður Hafsteinsdóttir fiðluleikari og Anna Guðný Guðmundsdóttir píanóleikari tvær sónötur; Sónötu fyrir fiðlu og píanó í F-dúr op. 8 eftir Edvard Grieg og Sónötu fyrir fiðlu og píanó nr. 1 í f-moll op. 80 eftir Sergei Prokofiev.

Auður Hafsteinsdóttir er fædd árið 1965. Hún lauk einleikaraprófi frá Tónlistarskólanum í Reykjavík árið 1983 aðeins 17 ára gömul. Hún stundaði framhaldsnám við New England Conservatory í Boston og lauk Bachelor of Music gráðu með hæstu einkunn. Auður lauk Master of Music gráðu árið 1991 frá University of Minnesota. Hún hefur hlotið fjölda viðurkenninga fyrir leik sinn. Árið 1985 fékk hún C. D. Jackson verðlaunin sem framúrskarandi strengjaleikari á hinni alþjóðlegu tónlistarhátíð í Tanglewood og 1988 fyrstu verðlaun í The Schubert Club Soloist Competition í Minneapolis. Árið 1991 var hún valin borgarlistamaður Reykjavíkur til þriggja ára. Árið 1996 voru henni úthlutuð listamannalaun til þriggja ára frá menntamálaráðuneytinu. Auður hefur stundað kennslu í fiðluleik við Tónlistarskólann í Reykjavík og Listaháskóla Íslands undanfarin ár. Hún hefur komið víða fram sem einleikari og í kammermúsik á alþjóðlegum vettvangi, m. a. í Bandaríkjunum, Kanada og víða á meginlandi Evrópu. Hún tekur reglulega þátt í tónlistarhátíðum hérlendis og hefur oft komið fram á erlendum tónlistarhátíðum. Einnig hefur hún farið í tónleikaferðir til Japan og Kína. Hún leikur reglulega með Trio Nordica og Caput kammerhópnum. Auður hefur leikið inn á fjölda geisladiska fyrir innlend og erlend útgáfufyrirtæki. Hún var valin bæjarlistamaður Seltjarnarness fyrir árið 2005.

Anna Guðný Guðmundsdóttir lauk námi frá Tónlistarskólanum í Reykjavík og Post Graduate Diploma frá Guildhall School of Music í London þar sem hún lagði áherslu á kammermúsík og meðleik með söng. Frá árinu 1982 hefur hún tekið virkan þátt í íslensku tónlistarlífi og er einn eftirsóttasti píanóleikari landsins. Hún hefur komið fram sem einleikari, m. a. með Sinfóníuhljómsveit Íslands, Kammersveit Reykjavíkur og Íslensku hljómsveitinni. Anna er einnig virkur kammertónlistarmaður og meðleikari söngvara. Hún hefur leikið inn á fjölda hljómplatna og diska og komið fram á tónleikum víða í Evrópu, Bandaríkjunum, Japan og Kína, m. a. með Kammersveit Reykjavíkur og Sigrúnu Hjálmtýsdóttur söngkonu. Hún leikur reglulega í tónlistarröðinni Tíbrá í Salnum í Kópavogi, hefur nokkrum sinnum komið fram á Listahátíð í Reykjavík og tók þátt í Listahátíðinni í Trento á Ítalíu árið 2002. Sumarið 2004 starfaði hún við listaakademíuna í Sion í Sviss. Hún var bæjarlistamaður Mosfellsbæjar 2002 – 2003 og var tilnefnd til Íslensku tónlistarverðlaunanna 2004 sem flytjandi ársins. Anna Guðný hefur verið ráðin píanóleikari við Sinfóníuhljómsveit Íslands, einnig kennir hún við tónlistardeild Listaháskóla Íslands.

Tónleikarnir hefjast klukkan 20:30. Kaffistofa safnsins er opin eftir tónleika.
Aðgangseyrir er 1500 kr.